為選擇醫院而煩惱3 － 點解想荃灣港安？

三月時打電話去荃灣港安問，佢地話產房仲未搬去新翼。聽張智醫生講，因為新翼產房地板鋪得唔係咁好，所以要整過，因而改遲左搬，最新消息係四月頭先搬。

同時張醫生話畀我地知，其實我地唔使咁早決定邊間醫院，現在無雙非既情況下，到32週打後先決定都未遲。因為佢話如果32 週前BB就搶閘出世，佢會建議我地去公立醫院，因為早產BB係私家醫院出世會。

既然係咁，我地唯有靜觀其變。

老實講，我都唔知點解我地咁Insisit 想係荃灣港安，我覺得最大原因係我同老婆都係荃灣長大，對呢個地方有情意結。不過荃灣港安的確有佢既好處。

1. 唯一一間醫院可以由待產到生產都係同一間房，唔使搬黎搬去。（我老婆超級Buy呢點）
2. 最新，張醫生都話對上一間新醫院已經係沙田仁安，但都係十年前既事。
3. 唔旺場，所以D護士人手好充足，亦好安靜。（朋友V 個人經歷）
4. 如果住一人或二人房，可以選擇叫護士帶BB到媽咪間房餵哺。
5. 價錢中等，雖然唔係最平個間私家醫院，亦唔係最貴。
6. 有教會背景，我地都想BB係主既帶領下來到世上。

但亦有唔好既地方

1. 好吊腳，住荃灣都未必一定知係邊，點去。
2. 太新，Run落唔知會唔會有咩問題。（我最擔心就係呢樣）

但同時我都開始諗下個Plan B，所以我地有留意下其他醫院。而又因為我地將搬去東九龍，所以我地都諗過下浸會醫院 和 法國醫院。

我老婆有去過浸會醫院，但冇去過產房，亦冇朋友幫襯過。不過聽聞浸會醫院設施有番新，但亦聽聞之前有好多雙非、單非媽媽。

而法國醫院，有好多同事都幫襯過，佢地既Comment係如果住大房，環境都好逼下。我地亦打過去問下資料，聽D職員話好Full下，我地要盡快留位（當時係24週）。

始終我地都係想係荃灣港安，但我地都Set左一個Deadline，如果兩星期後產房搬左，就繼續港安，否則就再諗諗浸會醫院或法國醫院。

我相信主會為我地安排好一切。

by Chloe's Daddy