如何選擇奶泵 ? (1) － 最終選定 Spectra 9+

記得當我們要準備 BB 用品時，我們一直遲遲都未動手，為的是要等會展的 BB 展及各大百貨公司的 BB 展，準備買平貨 !

但是 BB 展的人山人海嚇怕了我們，事前沒做好功課作資料搜集，沒機會好好選購，只買了個月亮枕，所以待各大百貨公司 BB 展，事前做足了資料搜集。

所以當一田有 BB 展，我們目標是奶泵。我一開始已決定要電動、雙泵、便攜，這3個條件下，奶泵的選擇最主要有 3 大牌子，Avent , Spectra 及 Medela。

— Medela — 
我未生之前都未知自己是否真係可以有恆心毅力去餵人奶，雖然Medela 網上評價係最好，但當時擔心投資落這部機真係好貴，幾千元買部機萬一將來用不了就會好浪費。

— Avent — 
Avent係百貨公司試過，非常嘈，想像半夜起身泵奶會把老公同女女嘈醒。而且又好大部，攜帶起來不方便，不太適合我，不會考慮。

— Spectra — 
最後只淨下韓國的Spectra。一開始老公是傾向 Medela 的，認為外國品牌較有保證，但係我真係好驚會好大嘥，Spectra價錢平好多，相比下無咁大壓力。而且始終是韓國機，感覺上較國產品牌較有信心。

Spectra 各個型號中，網上最多人推薦 spectra 9+，而這個型號亦完全符合我所有要求。當初選這部機有以下考慮：

電動 - 我唔想用「手泵」泵到手到累
雙泵 - 兩邊一齊泵最省時
輕盈 - 雖然我基本上唔使出街泵，但係屋企泵行來行去也會較方便
寧靜 - 萬一夜晚起身泵奶，唔使嘈到老公同阿女
便宜 - 雖然係千色睇過9+ 正貨要 $1680，但比起 Medela 這個價錢都仲可以接受，而且水貨搵到可以平到 $980 

決定好型號，再來就是考慮水貨或是行貨。網上很多人說可以去G-market買，平好多。但我擔心 2 腳轉 3 腳電插唔方便，又驚用落壞左好麻煩，要下下寄去韓國諗起都煩，生左個B已經大把野忙，唔想再為這些事煩。

另一個選擇是水貨。很多網店聲稱是韓國代購，若有損壞可以代為與韓國那邊跟進。但係我仍然係好擔心唔穩陣，因為水貨包跟進都係寄返韓國原廠保養，一來一回起碼以星期黎計，湊住個 NB 已經好頭痛，唔想冒任何風險。 

除此以外有諗過好唔好租用。因為用 Spectra S1 (原價賣 5K) 的話，可以去香港代理度租。 不過，奶泵咁貼身嘅野，朋友間二手都話可以諗諗，若果係人人都用過的，我自己真係接受唔到。

係咁嘅考慮下，唯有花錢買安心 (初手媽媽已經好多野煩，唔想因為奶汞問題再煩惱。) 所以，最後又轉返諗行貨。

行貨我地睇左好多間舖，都要 over $1500，香港代理正價係 mark $1680。我地去行一田 BB 展，竟然俾我地睇到 9+ 連冰袋套裝 (原價$260) 都係賣 $1400，價錢好吸引。

不過，最搞笑係 M1 (電動單汞) 竟然賣 $6XX，即係買 2 部單汞都仲平過 1 部雙汞 !

我老公極力游說我買 2 部單汞 :

1/ 價錢問題 - 2 部機仲平過1 部，又係 "雙汞" (我老公認為 2 部單汞就即是係雙汞)，咁梗係揀平果個選擇。
2/ 穩定性 - 我之前有擔心過，如果部機汞汞下壞左點算。 老公話有 2 部機，肯定唔使驚會 2 部一齊壞。
3/ 保值 - 對! 竟然俾我老公諗到先用 1 部單汞，真係有奶又想 keep 住餵人奶，到時再開另一部，從單汞變雙汞。 萬一到時無奶用唔著 2 部，仲有一部全新嘅單汞可以賣返出去。

當然我無聽我老公講 (傻的嗎)，攞住 2 部單汞行黎行去咁麻煩，真係想拎個電話或者飲杯水都行唔到 ! 就係咁，我決定買 spectra 9+，係一田 BB 展買仲有連冰袋套裝、儲奶袋同 2 個奶樽送。

回到家，立即試叉電，同試汞。未生未上奶，無咩感覺。 預先洗好晒各個配件 (好簡便，奶樽 + 喇叭 + 漏咀，幾件配件而已，喉管與連接部機的配件聽 sales 說最好不要入水)，放入膠盒，等 BB 出世就可以大派用場。 

其實我對於是否要全人奶不太強求，因為希望唔好俾太大壓力自己。 俾定心理準備自己，若是沒有奶，同自己講BB食奶粉都 OK，我同老公食奶粉大咪又係好健康。 打定輸數，起碼到時唔會因為追奶迫到自己產後抑鬱。話雖如此，餵人奶各項知識同用具都要預備定，做定兩手準備，好好迎接我家大小姐到來 !

by Chloe's Mama