為選擇醫院而煩惱1 － 私家醫院 VS 公立醫院

其實未知道有bb 之前，已經偷偷地做定醫院既research。但因為選擇醫院既因素太多： 價錢、地點、醫生、環境、設施等等都要考慮，所以到好後期都未決定到。

其實我都問左好多人既：

私家醫院支持者

師奶同事Q（佢個女係法國醫院開刀出世）: 梗係私家醫院啦，你會生得幾多個丫，對個老婆好d啦，公立醫院好又逼又多人，對媽咪休息唔好，探訪時間又短。

男同事A （佢個女係養和醫院開刀出世）：一定私家啦，係要畀幾皮野，但真係好好service 喎，酒店咁既款。幾時睇BB都得。信我，一定值。

男同事K（佢個仔係荃灣港安開刀出世）：私家啦。咩話？你老婆諗住順產？咁使乜私家呀，但醫生冇野做架喎，畀幾萬銀個醫生做啦啦隊？

男同事T（佢個仔係東區醫院順產出世）：其實公立醫院都ok 既，而家冇左雙非，環境好左d,有d姑娘都好好，不過都有d好惡。但真係平好多，順產三日$300，開刀五日$500。留返D錢買野畀老婆補下仲好啦。

男同事D（佢太太懷緊孖胎，快將出世）：私家就對媽咪舒服，公立就對BB好d，因為touch wood有咩事公立醫院設施好D。醫生經驗好d。（後記＠Jan 2016: 最後佢太太係瑪嘉烈開刀誕下一對孖BB)

綜合各方意見，結論係

私家醫院Comment都係好好

1. 私家醫院，媽媽休息好好多，因為有護士照顧BB，唔使自己做。但公立醫院，媽媽生完幾個鐘後就要自己湊BB。
2. 私家醫院探訪時間好Free，公立醫院好短，而且限人數。

公立醫院Comment都唔差

1. 因為現在冇晒雙非，D護士對媽媽都唔會好差。
2. 公立醫院收費好平，尤其如果BB有咩事，私家醫院收費就好襟計。

其實，我地已經留左一個budget which is 應該夠應付私家醫院既費用，加上公司保險cover 左一部分費用，再加上我地一早有一個心儀既醫院，所以應該係go for 私家醫院，但，有一個comment令我猶豫左好耐我老豆既comment。

我老豆：當年你呀媽都話要去私家生架，點知你呀媽個表姐出左事，即刻唔敢再講要去私家啦！（咩事？）個時佢表姐穿左羊水，又生唔出，過左一段時間，私家醫院話要轉去公立，仲要教佢唔好同公立醫生講穿左水（咩玩法！？），結果唔知係咪BB缺氧，出世後個腦有d問題。

註：呢單野我細細個就聽過，件事發生係三十幾年前，而且冇證據證明BB問題係問真係同缺有關。

不過正正就係呢件事，令我對私家醫院始終有保留。

by Chloe's Daddy